СТЕВАН   НАУМОВ  -  СТИВ

ПАТРОН НА УЧИЛИШТЕТО

Роден е на 27.10 1920 година во Битола, како четврто дете на Јана и Васил Наумови. Основното образование го започнал во учебната 1926/27 во сегашното , но тогашно српско училиште  ,,Вук  Караџиќ,,. Уште во тоа време Стеван почнал да ги  пројавува главните црти на карактерот: бистрина, снаодливост, храброст, трудољубивост, искреност, отвореност, соодветна срамежлива повлеченост, љубов кон другите и готовност да им се помогне на оние коишто имаат потреба од некаква помош. Тие основни црти го прателе до крајот на неговиот млад живот.

   Гимназија завршил во Битола, а студиите  на Техничкиот факултет ги започнал во Белград каде што го затекнала и Втората Светска војна. Во 1940 се вратил во Битола.

  Веќе во април 1941 учествува во формирање на  Првиот партизански одред ,,Пелистер,, , а на  6.07.1942  и на битолско-преспанскиот партизански одред ,,Даме Груев,,.  Неговата активност била забележана од  фашистичкиот окупатор и тој превзел мерки за негово ликвидирање. Поради убиството на полицискиот началник на Битола бил осуден на смрт во отсуство и била распишана награда од 200.000 лева за оној кој ќе го фати или пријави.

   Подготвувајќи го народот за востание на  11.09.1942, Стив престојувал во селото Болно-Преспанско. Но тој тука бил предаден и опколен.  Утрото на 12.09.1942, заедно со неговиот  близок пријател, борец и македонски поет Мите Богоевски се бореле во нерамна борба против цела чета. Мите загинал, а Стив уште цели пет часа сам ја продолжил борбата сé до последнот куршум.  Стив ја извадил последната бомба и  легнал врз неа за да не им падне жив во рацете на поробителите.

    Тој загина за да живее вечно слободата на  неговиот  народ, во срцата и душите на идните поколенија, во срцата и душите на учениците од ова училиште, кое со гордост и почит го носи неговото име.